Luk 9 | WSK | STEP | Jesus ko olekem 12 nunga auram se kote taiman, se marak sokel bur memek duap duap te nunga karomonko, ale kuera ikes te nungurmonko mu nungaram.

Luke 9

Jesus olekem 12 ura nungaram

(Mat 10:5-15; Mark 6:7-13)

1 Jesus ko olekem 12 nunga auram se kote taiman, se marak sokel bur memek duap duap te nunga karomonko, ale kuera ikes te nungurmonko mu nungaram. 2 Ale nu nunga diruwuram se Kaem ko den gilalong yawara balu se kariimet kuera ikes ago wore nunga nungurmonko namakasan.

3 Nu nunga maonam, “Aolak iluwalko mu mel bo me gialko. Nina sikir, karar, na inang, manga, se ningimik guang bo ta me gialko. 4 Nina namaral se kawam ningarmon umutang te la baga se ura ani ningarem mu beteralko. Se udagi te nina wonong mu beteral namaralko mu kawam mu beteralko. 5 Bare wonong bo nengerak me amilmilomon ale nunga kawam te nengerak me namomon agi mu, nina wonong mu beteral ale nama se, ali gege nisiwik te aniso mu siwu wonong mu te bita se namaralko. Se wonong mu ko kariimet te ikimonko Kaem nononga munan mu ko gomang ikuwuso.”

6 Buta se olekem namaman ale Kaem ko den gilalong yawara balu se, kariimet kuera ikes ago mu nunga nunguru se, wonong suen biya te geragaman.

Herod Jesus ko kuamin yeneram

(Mat 14:1-2; Mark 6:14-16)

7 Galilee kari biya Herod ^{▼▼Luke 9:7 Mu Herod Antipas, Herod Biya ko kuriang.} mel suen biya aratukaso wore ko den ikiam ale ikia moakaso. Mu awuk, kariimet sang Jesus arikasan ale “Anuwa Kari John kueram bare aking barasam,” makasan. 8 Se sikina noko balukasan, “Mu Elijah, girakala ko prophet kueram bare aking barasam,” makasan. Se sikina balukasan, “Mena. Mu girakala ko prophet bo wore barasam,” makasan. 9 Bare Herod balam, “Ani Anuwa Kari John ulengkala dogotak batagem pa!” mam. “Bare kari ewere awiri bare ko den suen biya ikisam?” Ale nu Jesus arigokko kaeyakaso.

Jesus kari 5000 na nungaram

(Mat 14:13-21; Mark 6:30-44; John 6:1-13)

10 Jesus ko gilalong kari peleman taiman ale mel suen biya beteman wore ko nu manorman. Se nu nunga giam ale nuna la nongota diram arungak wonong bo ko nup Bethsaida mu te namakasan. 11 Bare kariimet nu Bethsaida namakaso mu ikiman, ale kowom karoman nukote nama arataman. Se nu arungak amilmilaram ale Kaem ko kingdom ko nunga manarukaso, ale kariimet kuera ikes ago mu nunga nungurukaso.

12 Se sor baingam se olekem 12 mu nukote taiman ale manorman, “Ni kariimet nunga manaru se wonong wonong namomon ale na yu ko loagomon, ale kuwim te animonko mu aringimonko. Mu awuk, sor kuwim imi kariimet bo me te bagoso.”

13 Bare Jesus nunga maonam, “Nina nengeta na sang nungaral se namonko,” mam. Se nuna balman, “Ana bread 5 se wal ilagala butata aniso,” maman. “Se ni ana namanak kariimet motam biya anisan wore nunga na inang dianakko ko balsam e?” 14 (Nuna uwuta balman, mu awuk, kari 5000 iwita bagakasan.)

Bare Jesus ko olekem nunga maonam, “Nina nunga maonal se motam 50 50 iwitata dagi namomonko,” mam.

15 Se olekem butata nunga manorman se dagiman. 16 Se Jesus bread 5 wal ilagala mu giam ale taiti kuali loaga se Kaem aru maonam. Asele pakokaram ale ko olekem nungaram se kariimet nungaru gurugu ago namaman. 17 Se kariimet na naman nungumik ago terong ma muruwuram. Asele olekem alo na nukum wogaram mu korokem 12 tuguman se kuring aratu namaram.

Peter wetang te balam Jesus mu Kristus mam

(Mat 16:13-21; Mark 8:27-31)

18 Tom bo te Jesus ngatangawaram se ko olekem nuna pingita la bagaman. Mu Jesus ko olekem arungu nongota, se nu nunga isuam, “Kariimet pa ani awiri ko aga balsan a?” mam.

19 Se nuna ko den koma balman, “Sikina nika balsan mu ni Anuwa Kari John masan. Se saki ka balsan mu ni prophet Elijah masan. Se saki ka balsan mu ni girakala ko prophet bo tala bare aking barasem ma balsan.”

20 Se nu nunga isuam, “Se nina nengeta mu ani awiri ko iwita aga balsan a?”

Se Peter nu maonam, “Ni mu Kristus, ni ana Israel nanga sangaruko Kaem ka balam borta.” ^{▼▼Luke 9:20 Peter Jesus ko den balam: John 6:68-69.}

21 Jesus ko olekem nuguring ninguru kaolam, nuna den Peter balam owore kari bo me manarmon se ikiokko mam. 22 Nu nunga maonam, “Kari ko Kuriang nuna ikup yaman suen biya tumon se giokko. Kari bibiya, priest bibiya, se Law Den ko kausa kari bibiya nuna nubiring tumonko. Nuna momon se kueruk, ale tom ilagala suwan mu te aking barasukko.”

Jesus ko olekem ikup gimonko mu ko me nguangomonko balam

(Mat 16:24-28; Mark 8:34-38)

23 Se nu ko olekem kariimet ago nunga maonam, “Kari bo ani agowom karukko, mu nu kota ko ikia, ko gomang buring tuok, ale kota ko tam kangono tom suen biya giok ale ani agowom karukko. 24 Mu awuk, kari bo kuerukko nguanguruk ale ani agowom me karuk, mu nu Kaem ko marak yawara tom suen biya te bagurukko mu me taukko. Bare kari bo kuerukko me nguanguruk, am ani agowom karuk, mu kari mu Kaem ko marak yawara tom suen biya te bagurukko mu taukko. 25 Se kari bo ali imi te mel suen biya giam, bare mel suwanta nu Kaem ko marak yawara me tam ale kueram, mu melmasak gi lagaram mu awuk ta nu sanguk i? Mena.

26 “Kari bo aninga den kariimet nomokete balukko nguanguruk ale buring aisuk, mu betelatala Kari ko Kuriang, tom nu peleruk tairuk mu nu kari awiriya buring nu tuam mu betela buring tuokko. Tom mu te nu kota ko nikim biya mu karogo se, Kaem ko nikim biya mu karogo se, engel kako alo nikim biya ago mu arungu peleruk tairukkowo.

27 “Bare ani den nunguning ninga manorsam, kariimet sang imi te sanamiwasan mu saki me kuemon baga, Kaem ko kingdom tairuk se aringimonkowo.”

Jesus ko kumik koma lilim la nikim pagam

(Mat 17:1-13; Mark 9:2-13)

28 Jesus den mu balam se udagi te tom 8 namaram se nu Kaem ilak munakurukko se Peter James John nunga giam arungu duruk bo te nama tarigiram. 29 Ale nu Kaem ilak munakawaram se koma motam geragam duap bo aratam, se ko guang nikim pagam ale siraram nunguningkiri. 30 Se kari ilagala tairatela arataman ilak sanamaman ale ilak munakawakasan, bo Moses, bo Elijah. 31 Nuna nikim biyala karogo arataman. Ale nuna Jesus Jerusalem kuerukko Kaem mungkala te balu beteram wore ko ilak balukasan.

32 Peter ko saki arungu animan kueman, bare aking maragaman ale Jesus geragam ale nikim biyala karogo bagaram mu aringiman, ale kari ilagala ilak sanamingaman mu ago nungarkaman. 33 Se Moses Elijah ilak Jesus beteman namangaman se Peter Jesus maonam, “Kari Biya,” mam, “ana imi te taiman bagasan mu yawarakala! Se ana kawam sasal ilagala suwan kalonakko, bo nika, bo Moses ko, se bo Elijah ko,” mam. Bare nu ninguru ko ikia to se den mu me balam.

34 Nu den mu am baluwaram se tairatela taiti nuwi bo tairam ale nunga iramuram se nguangaman. 35 Se kuring bo taiti nuwi ningi iwita balam, “Imi aninga Kuriang, ani ko balem borta. Se nina noko kuring karo tualko!”

36 Kuring den mu balu kutuwuram mu nuna Jesus kota bagaram se aringiman, ale kutek maman. Ale nuna kam mu te mel aringiman mu ko kari bo me manorman. ^{▼▼Luke 9:28-36 2 Peter 1:16-18 ago arikko.}

Jesus kuriang bo bur memek karogo wore nungam

(Mat 17:14-21; Mark 9:14-29)

37 Ukiram se Jesus ko olekem ilagala suwan arungu duruk beteman nama kapaman se kariimet suen biya Jesus aringiman. 38 Se kari bo kariimet motam biya mu ningi auram ale balam, “Kari biya,” mam, “ni aninga kuriang kari ewere arikko,” mam. “Nu aninga kuriang suwanta diram. 39 Tom suen biya bur memek nu kumik ningi wore nu ilukaso se nu biyala nia aikaso. Se yukuru sisupukaso se aliti dagulukaso, ale kuating ngisuk kuring ko aratukaso. Nu kumik guang ninguru maguwukaso, ale tairate bitiruk ale namurukko me kuakaso, am ilukuawuwakaso. 40 Se ani nika olekem nunga manem, bare nuna bur memek mu karomonko me terong.”

41 Se Jesus iwita balam, “Nina tom imi ko kariimet nina nengemang ningi nunguning mena, se nengemang aora biya. Ani tom awila nina nengerak bagirik se nina nengemang ningi nunguning arukko ya? Ani tom awila nenenga ikup giekko?” Jesus buta balam asele nu kuriang mu ko nuet maonam, “Ka kuriang to ale ilak tairko,” mam.

42 Se kuriang mu aolak iluwam taiwaram la, bur memek mu nu sisupu saparam se ali te dagulam, se aliti iri kututumukaso ale maguwu silatikaso. Bare Jesus bur memek mu sail te maonam se kuriang mu beteram se nungeram. Se nuet kuting te beteram. 43 Se kariimet suen biya Kaem ko sokel aora garagar aringiman ale tengeman.

Jesus kueruk ale barasukko den akingtala balam

(Mat 17:22-23; Mark 9:30-32)

Kariimet Jesus mel bitakaso wore ko nungamin yenakaso. Se Jesus ko olekem nunga maonam, 44 “Nina nedegewa ninguru tagiral ale den imi ikialko. Nuna Kari ko Kuriang ilumon ale kari saki nuguting te nu betemonkowo,” ma balam. 45 Bare olekem alo den imi ko nunguning yumuram se nuna ko ikimonko me terong, me ko ikikasan, ale nu isarmonko nguangakasan.

Kari numi ira kutuwuso mu nu gira bagoso ko den

(Mat 18:1-5; Mark 9:33-37)

46 Se olekem nuna awiri nononga ningi nunga gira bagurukko wore ko den tagikasan. 47 Se Jesus nononga nongomang ningi ikia towaman wore ko ikiam. Ale kuriang gotek bo tam beta dugu te beteram se sanamaram. 48 Se nu nunga maonam, “Kari awiriya aninga aip te kuriang imi gomang tuso ale aru taso, mu nu ani agotala gomang aisiso ale aru taso. Bare ani la mena. Nu Kari aga beteram se tairem mu agotala gomang tuso ale aru taso. Kari nenenga ningi kituwura nup mena ko numi ikiso beteso lagoso, mu nu gira bagoso.”

Kari nikerak me beteso mu nika bo

(Mark 9:38-40)

49 John balam, “Kari biya,” mam, “ana kari bo nika nip te bur memek karokaso se aringiman. Bare nu anananga bo mena. Se ana nu manorman nu ura sumu me bitirukko maman.”

50 Bare Jesus nunga maonam, “Koma me kaolalko,” mam. “Kari awiriya nina nengerak me beteso mu nenenga bo.”

Samaria wonong bo Jesus nubiring tuman

51 Jesus duruk wonong te namurukko tom pingi aram, se nu Jerusalem namurukko ko ikia suwan awuram ale namakaso. 52 Ale nu olekem saki nunga maonam se giriman Samaria wonong bo te kawam nuna te bagomonko mu se, melmasak sang ago nunguru bita se bagomonko mu ko nunga isarmonko nama gilingiman. 53 Bare wonong mu ko kariimet Jesus Jerusalem namawoso mu ko ikiman, ale nubiring tui gilingiman. 54 Se olekem ilagala, James John ilak, nuna kilek mu aringiman ale Jesus manorman, “Kari Biya,” maman, “ni awuk ikisam, ana Kaem duruk te mu aru manornak se nu tama bitiruk se tai kapuruk se kariimet imi kanimonko e?”

55 Bare Jesus giris palagam ale ining nungaram. 56 Ale nu ko olekem arungu aolak iluman wonong bo te namaman.

Kari sang Jesus ilak namomonko balman

(Mat 8:19-22)

57 Nuna lage Jerusalem namaram mu karoman namangaman se kari bo Jesus maonam, “Ni sor apareyate namarko bare ani am kerak la namirikkowo,” mam.

58 Se Jesus kari mu maonam, “Kausik diwang mu nunga garap gogong karogo. Se inanganang mu nunga singir karogo. Bare Kari ko Kuriang mu kuwim ito te bagurukko mu mena.”

59 Jesus kari bo tala maonam, “Ni tair agowom karoko.” Bare kari mu Jesus maonam, “Kari Biya,” mam, “ni aing me se ani namirik ait kueram mu mutim tugumek asele tairik kerak namirikko.” ^{▼▼Luke 9:59-60 Kaem ko kingdom mu mel gira ko balnakko: Luke 14:25,33; Mat 6:33.}

60 Se Jesus nu maonam, “Kari kuera mu nongota nunumi mutim tugu se bagomonko,” mam. “Bare ni namar ale Kaem ko kingdom ko den baluko.”

61 Aking kari bo tala Jesus maonam, “Kari Biya,” mam, “ani ni kewom karikkowo. Bare ni aing me se, ani namirik aninga ayam ait, agoras ari, aga launuria nuguting iluwek ale asele tairikko,” mam.

Bare Jesus nu maonam, “Kari bo dal ko yager iluso ale diruwuso ago nama se, bare motam peleso se buring ko loaga se loaga se karogo namawoso, mu kari uwuta mu Kaem ko kingdom ko ura karogo me terong.” ^{▼▼Luke 9:62 Ikia suwanta te Jesus kowom karonakko: Phil 3:10,13-14.}

62